सिरहाको कल्याणपुरमा आशकां गरिएको गाईको मासु बरामद, एकजना प्रहरीको खोरमा, स्थानीयद्धारा प्रदर्शन
सिरहा । सिरहाको कल्याणपुरमा मुस्लिम समुदायका व्यक्तिहरुले गाईको मासु बेचेको भन्दै बुधबारदेखि नै गाउँमा तनाव उत्पन्न भएको छ । सिरहाको कल्याणपुर नगरपालिका वडा नम्बर १० स्थित बसेको मुस्लिमहरुको नयाँ वस्तीमा गाई काटेको भन्दै हिन्दु समुदायका स्थानीयहरुले बुधबार बिहानैदेखि विरोध जनाउँदै आएको छ ।
नेपालको राष्ट्रिय जनावर एवम् हिन्दुहरुको पूजनीय मानिने गाई काटेको भन्दै दुई पक्षबीच तनाव उत्पन्न भएको हो । बुधबार विहान करिब ११ बजेको समयमा सो बस्तीमा गाईको मासु फेला परेको भनेर प्रहरीलाई जानकारी गराइएको थियो । गाई काटेको खवर सुने लगत्तै केही बेरमै सो वस्तीमा पुगेका जिल्ला प्रहरी कार्यालय सिरहाका प्रहरीलाई देखेपछि केही जना फरार भएका छन् । सोही बस्तीबाट २ किलो मासू बरामद भएको जिल्ला प्रहरी कार्यालय सिरहाले जनाएको छ । यद्यपी, सो मासु गाईकै रहेको वा नरहेको बारे पुष्टि अझै नभएको जनाइएको छ । जिल्ला प्रहरी कार्यालय सिरहाका प्रवक्ता डिएसपी शँकर चौधरीका अनुसार सो वस्तीमा धनुषाको जनकनन्दिनी गाउँपालिका वडा नं. २ बल्हागोठ बस्ने बर्ष ६३ को गरफुदिन शेखले मासु लिएर गएको प्रारम्भिक अनुसन्धानबाट खुलेको हो ।
शेखको साथबाट २ किलो मासू र ८० रुपैयाँ बरामद भएको डिएसपी चौधरीले जानकारी दिए । मासुलाई ल्याब टेष्टको लागि पठाउने तयारी भईरहेको पनि बताए । उनले आरोपितले समेत गाईकै मासु भएको भनेर सँकेत दिएको बताएपछि यथार्थ पुष्टि गर्न ल्याब पठाउने तयारी गरिएको बताए । गाईको मासु ठहरिएमा राष्ट्रिय जनावर काटेको आरोपमा उनलाई सोही बमोजिम सजाय हुने जनाइएको छ । यता, सोही वस्तीमा बस्ने जमसेद अन्सारीले गाईको मासूको विरोध गर्दा गालीगलौज गरेपछि उनलाई पनि प्रहरीले पक्राउ गरी नियन्त्रणमा लिएको छ । यता दुई समुदायबीच कुनै घटना हुन नदिनको लागी आज इलाका प्रहरी कार्यालयमा सर्वपक्षीय बैठक बसी छलफल भएको छ । उक्त छलफलमा कल्याणपुर नगरपालिकाको मेयर रामपुकार शाह, इलाका प्रहरी कार्यालय मिर्चैयाका इन्सपेक्टर सोनु कुमार शाह, वडा अध्यक्ष र स्थानीयहरुको सहभागिता रहेको थियो ।
